Strobe lights and blown speakers

smá update

2009-09-20T03:54:00.001-07:00

jæja, langt síðan ég hef skrifað hérna.

ég setti bloggið mitt á pásu núna í síðasta vetur. Ég varð svo miður mín þegar ég sá að ég gæti ekki flutt heim aftur til Íslands og ég vissi ekkert hvað yrði um mig að ég hafði enga löngun að skrifa hugleiðinar mínar niður.

Ég kláraði M.Sc. ritgerðina mína í vor og er kominn með M.Sc. gráðuna mína. Mér finnst mjög skrýtið að hugsa til þess að skólagöngu minni sé lokið, ég hef alltaf verið í skóla allt mitt líf. Mér fannst samt mjög gaman að vera í skóla, en engu að síður fann ég að ég var orðinn pínu þreyttur á því og langaði aðeins að breyta til.

Ég sótti um nokkrar vinnur í maí í Noregi og ég fékk strax hringingu daginn eftir frá einu fyrirtæki sem var mjög áhugasamt að tala meira við mig. Ég fór í tvo símaviðtöl og eitt alvöru viðtal og réðu mig í kjölfarið. Fyrirtækið heitir Reinertsen og þetta er mjög fræg verkfræðistofa hérna í Skandenavíu og er staðsett í Þrándheimi, Bergen, Oslo og Gautaborg. Ég fékk stöðu hérna í Bergen. Ég vinn á röradeildinni og vinn við að hanna olíu og gaspípur og uppistöðurnar sem halda þeim uppi. Reinertsen hérna í Bergen er bara með einn viðskiptavin og það er Statoil Hydro. Við sjáum um 3 olíuborpalla fyrir utan Bergen og það er eina sem við gerum núna. Reinertsen í Bergen er samt að stækka við sig og við vonum að við getum fengið fleiri verkefni í náinni framtíð, því það er kannski ekkert sniðugt að vera bara með einn viðskiptavin, því ef hann fer á hausinn eða segir upp samningnum við okkur þá erum við screwed. Ég fékk mjög fína skrifstofu. Við erum 4 sem deilum henni saman, einn Íslendingur (ég ) , einn Svíi, einn Indverji og einn Norðmaður. Það er alltaf verið að gera grín af okkur hvað þetta er international skrifstofa :), en okkur er alveg sama.

Ég fann mér herbergi til að búa í hérna í Bergen. Við erum 4 sem búum hérna í íbúðinni, 2 strákar og tvær stelpur. Stelpurnar eru í skóla en við strákarnir erum báðir með vinnu, hann er í sjóhernum en vinnur samt 8-16 vinnu eins og ég. Þau eru öll rosalega fín og ég er feginn að hafa kynnst þeim.

Ég er búinn að vera að djamma eiginlega allt of mikið síðan ég kom hingað, ég hef bara reynt að fara eins mikið út og ég get til að hitta og kynnast fólki. Norðmenn eru rosalega vinalegir, kannski ekki alveg jafn vinalegir og Svíar en minna feimnir upp á móti. Það eru allir rosalega áhugasamir um Ísland og ég er búinn að bjóða mjög mörgum í heimsókn næsta sumar. Norðmenn og reyndar trúlega fleiri hafa mjög brenglaða ímynd á ástandinu á Íslandi, halda bara að allt sé farið, það er búið að spyrja mig 2x í vinnunni hvort ég þurfi að senda launin mín heim til að sjá fyrir fjölskyldunni. Ég svosem veit ekki hvað ég á að segja þeim, finnst mjög erfitt að leggja eitthvað mat á ástandið, t.d. hvað þetta verður mikið verra áður en þetta verður betra og hversu langan tíma þetta muni taka að ganga yfir.

Ég er samt mjög feginn að vera kominn hingað til Noregs og líkar bara rosalega vel. Ég skal lofa að blogga meira framvegis, og jafnvel skella inn myndum hérna líka :)

bæjó í bili

Jói

svínaflensa , ritgerð og fleira

2009-04-28T10:48:00.000-07:00

Það er fátt talað um annað heldur en Svínaflensu í fréttunum, bæði á Íslandi og Svíþjóð, ég nenni ekki að stressa mig yfir henni samt, stress veikir ónæmiskerfið ef það er rétt þá deyja þeir fyrst(og jafnvel eingöngu) sem hafa áhyggjur af þessu :), allri alvöru fylgir eitthvað grín....

Ritgerðarvinnan gengur bara vel, ég skilaði eintaki af ritgerðinni í dag til að kennarinn geti séð uppbygginguna á henni. Lokaeintakið fær hann síðan föstudaginn 15. maí. Hann ætlar að nota helgina til að lesa hana yfir og ég fæ hana aftur á mánudaginn til að laga. Ég vona að samt að það þurfi ekki að laga hana mjög mikið. Fyrirlesturinn flyt ég síðan 4. júní og vona að ég sjá ykkur sem flest þar ;).

en ég er ekki búinn að fá svar með neina vinnu ennþá, ég samt nenni ekki (og hef ekki tíma) til að hugsa mikið um það.

Ég flutti fyrirlestur um niðurstöðurnar úr ritgerðinni minni síðasta föstudag fyrir einhverja gaura úr lestarteinabransanum, og kennurum úr skólanum mínum og kennurum úr KTH. Það gekk bara furðuvel og þau virtust ánægð. Mér fannst þetta samt frekar stressandi, sérstaklega að þau voru að nóta niður hjá sér fullt á meðan ég var kynna, fór þá að hugsa hvort það væri eitthvað vit í þessu sem ég var að gera.

En allaveganna þá er ég alveg búinn með 1/2 lokafyrirlesturinn núna :)

ég hlakka rosalega til að skila þessu en það stefnir í það að ég verði rosalega bussy þangað til, þarf að vinna öll kvöld held ég þangað til

styttist..

2009-04-02T12:30:00.000-07:00

4. júní er dagurinn eins og planið er núna, dagurinn sem ég skila ritgerðinni.

annars féll ég fyrir einu aprílgabbi í gær, ég trúði því að Íslandsbanki væri að gera bílana hans Jóns Ásgeirs upptæka....

bestu kveðjur

orð skulu standa...

2009-03-26T14:00:00.000-07:00

ætla að blogga fyrst ég lofaði því

það var ekkert svo hræðilegt að verða 25 ára. Hélt að þetta yrði meiri breyting.

En allaveganna get ég ekki hagað mér barnalega lengur, þarf að bera ábyrgð og þarf að skipta máli.

Mastersverkefnið gengur allt í lagi, ýmis tæknileg vandamál sem hafa hrjáð mig en þetta virðist allt virka núna.

Það er alveg að koma helgi, verður reyndar ekki mikil helgi, mikið sem ég þarf að gera....

kveð í bili

Afmæli

2009-03-22T06:56:00.000-07:00

smá afmælisblogg

Ég er orðinn 25 ára
finnst ég samt ekki vera 25 ára...
en annars er ég bara sáttur við þetta, get ekki verið unglingur endalaust.

Verkefnið gengur allt í lagi, er kominn með fullt af niðurstöðum. Mun setja þær hérna á bloggið :).

ég skal lofa að blogga meira í vikunni, er bara ekki í bloggstuði í dag og ekki undanfarnar vikur heldur

bið að heilsa...

bad dreams?

2009-03-03T02:12:00.001-08:00

Who watches the Watchmen?

2009-02-28T15:52:00.000-08:00

ég er að bíða eftir mynd núna í bíó sem heitir Watchmen. Mynd er byggð á mjög frægri myndasögu eftir Alan Moore (V for Vendetta og fleiri). Ég keypti myndasöguna síðasta sumar og var alveg agndofa hvað hún náði að snerta mig djúpt. Bókin fjallar lauslega um ofurhetjur í New York. Aðeins ein þeirra hefur samt alvöru ofurkrafta, hinar hetjurnar eru aðeins grímuklæddar og reyna að gera heiminn að betri stað með misgóðum árangri. Ég held að ef ofurhetjur væru til þá væru þær í líkingu við þessar .Ég mæli með þessari bók fyrir alla. Hún er reyndar rosalega dökk og þung í lesningu en skilar miklu til baka.

Ég er svona hæfilega bjartsýnn á myndina, ætla ekki að gera mér of miklar vonir, trailerarnir lofa góðu samt

Sokkar

2009-02-18T13:33:00.000-08:00

Ég hef oft velt því fyrir mér hvort sokkar séu í eðli sínu ósamstæðir. Allaveganna held ég því fram að mínir séu þannig.

Kannski er það bara málið tveir eins sokkar vilji bara ekki vera lengur saman og langar að leita á önnur mið? Erfitt að neyða einhverja að vera saman ef þeir vilja það hvorugir. Ég get alveg skilið að þeir verða leiðir á hvor öðrum, framleiddir á sama tíma, heftaðir saman áður en þeir eru keyptir og síðan eru alltaf undnir saman þegar þeir eru ekki í notkun og þegar þeir eru í notkun eru þeir bara innan við 1m fjarlægð frá hvor öðrum.

ég ætla héðan í frá að vera í sokkunum bara eins og þeir koma úr þurrkaranum, bara lofa þeim sjálfum að para sig saman og þá eru allir ánægðir :)

já og þá vitið þið það, ef ég er ekki í samstæðum sokkum þá er það ekki það að ég nenni ekki að para þá , ég bara er að gera sokkunum til geðs .....

lítið að segja...

2009-02-09T12:46:00.000-08:00

hlægið bara :)

Mastersverkefni

2009-02-02T08:55:00.000-08:00

hérna er smá myndband af því sem ég er að gera. Kannski erfitt að sjá út hvað þetta er en þetta á að vera smá bútur úr hjóli af lest vera að keyra yfir lestarteina. Þetta er mjög áhugavert verkefni en guð minn góður hvað ég get orðið brjálaður á þessu. Það er bara svo margt sem getur farið úrskeiðis og gerir það nánast alltaf fyrst áður en ég næ að keyra þetta. Þetta er rosalega þungt í keyrslu og ég fékk aðgang að tölvuklasa hérna í skólanum til að reikna þetta á. Tölvuklasinn samanstendur af meira en 1000 örgjörvum og man ekki einu sinni það er mikið vinnsluminni.

Þetta samt gengur ágætlega. Bara mikil vinna.

En af stjórnmálum þá er ég bara nokkuð ánægður með nýju ríkisstjórnina og ég vona að hún komi einhverju í verk og sjái til þess að ég geti fengið einhverja vinnu þegar/ (og ef) ég flyt heim.

en ég ætla í ræktina

bið að heilsa ykkur

Don't look back in anger...

2009-01-26T10:05:00.000-08:00

Oasis voru að spila hérna í Gautaborg í gær og að sjálfsögðu fór ég. Þeire eru rosalega góðir á tónleikum, kannski ekkert mjög persónulegir en mjög góðir engu að síður. Ég var mjög sáttur við að hafa farið þó það hafi kostað skildinginn :), en eins Jóakim Aðalönd segir alltaf "peningar gera mann ekki hamingjusaman".

en annars gengur lífið bara sinn vanagang, hérna í Svíþjóð. Er hálf feginn að vera hérna þegar eru svona mikil læti heima í stjórnmálum og efnahagslífinu. Það er reyndar alveg óþolandi að svara einhverjum spurningum um þetta og ég segi bara alltaf að ég hafi ekki hugmynd um hvað sé að gerast.

Mér skilst að eitt af megin ágreiningsefnum ríkisstjórnaflokkana hafi verið um hvar ætti að borða í hádeginu alltaf. Samfylkingin vildi fara á Nonna-bita en Sjálfstæðisflokkurinn vildi ekki sjá neitt annað heldur en Quiznos. Vinstri grænir setja það skilyrði að það verði alltaf farið á Subway í hádegismat og Frjálslyndir vilja Pizza Hut og er það meginástæðan að Samfylkingin vill ekki fara í stjórnarsamstarf með þeim. Erfitt mál að eiga við því enginn vill gefa eftir :).

en þið lifið heil, ég ætla að fara að herða reiðhjólið mitt upp, það er orðið svo gott veður úti að ég ætla að fara að hjóla aftur, langt síðan ég hef fengið mér góðan hjólatúr.

lifið heil :)

góðu skapi :)

2009-01-21T12:31:00.000-08:00

ég er búinn að vera frekar geðvondur og önugur síðustu daga en allt í einu líður mér miklu betur. Það hefur bara verið margt að þjaka mig , og þó svo að ekkert af því hafi breyst þá ætla ég að taka annan vinkill á málið og lofa framtíðinni að koma mér á óvart. Lít bara á þetta sem óvissuferð. Ég held samt að það verði raunin að ég flytji ekki til Íslands aftur þó ég ætli ekki að útiloka það, ég reikna bara síður með því.

Ritgerðarvinnan gengur vel, ég er mest bara að forrita allan daginn. Ég skal setja jafnvel mynd af því sem ég er að gera hérna á bloggið.

styttist í helgina :),

kærar kveðjur

blogg

2009-01-19T14:56:00.000-08:00

ætlaði að byrja að segja eitthvað, finnst ég bara vera svo óáhugaverður þessa dagana, þarf eitthvað inspiration. Ætla að fá mér einhverja góða bók á bókasafninu á morgun, sé til hvort það veiti mér innblástur í eitthvað

ætla að leggja mig, heyri í ykkur

up and running

2009-01-13T08:23:00.000-08:00

ég er kominn aftur til Gautaborgar. Var frekar þungt yfir daginn sem ég kom, ískalt og hellirigning.

Nú tekur bara alvara lífsins við. Ég er núna að gera mastersverkefnið mitt. Þetta virðist vera rosalega stór biti að kyngja. Ég verð bara að koma reglu á hlutina, er alltaf búinn að sofa svo lengi frameftir. Mér var úthlutað góðu skrifborði á skrifstofu sem aðrir Mastersnemar eru að vinna sín verkefni líka. Það eru skilveggir allt í kring um mig þannig að ég er ekkert mikið var við þá. Þetta leggst samt ágætlega í mig. Ég fæ líka laun fyrir að skrifa þetta, alveg 25.000 SKR sem er alveg töluverður peningur.

æji ég er eitthvað svo andlaus, ætla í Xbox 360 :)

súrmjólk í hádeginu og seríos á kvöldin....

2009-01-01T06:42:00.000-08:00

ömurlegt ár að baki. Reyndar getur ástandið ekki orðið öllu verra þannig að maður verður að "horfa björtum augum fram á veginn".

Reyndar var kannski árið ekkert svo slæmt, svona þegar maður rýnir betur í það. Mér gekk vel í skólanum, eignaðist fullt af nýjum vinum, fékk mjög góða sumarvinnu og skemmti mér vel nánast um hverja helgi :).

Reyndar er ég ekkert mjög spenntur fyrir nýja árinu frekar en aðrir. Ég er ekki búinn að finna neina vinnu fyrir sumarið en ég er að fara að reyna vinna í því núna. Ég veit ekkert hvað verður um mig ef ég fæ ekki vinnu hér á Íslandi. Ég ætla að leita í Noregi líka og gá hvað gerist.

Jólafríð fór ágætlega í mig. Reyndar er ansi þröngt heima fyrir Norðan þegar við erum öll þar. Mamma og pabbi verða líka alltaf svo stressuð því þau eru alltaf að reyna að gera okkur öllum til geðs í einu sem gengur sjaldnast upp.

en nenni ekki að skrifa meira, yfir og út....

jólin nærri því komin

2008-12-24T06:55:00.000-08:00

og ég er kominn heim eftir langt ferðalag.

Ferðin heim gekk samt bara vel, ég hef bara aldrei þolað flugvelli og vesenið sem fylgir þeim.

Ég tók lest á laugardagskvöldið til Kaupmannahafnar og gisti hjá Pétri vini mínum. Flugið mitt síðan til Rvk var um hádegi og var alveg 4 klst. í staðinn fyrir 3 vegna mótvinds.

Það var vel tekið mér á Keflavík, Siggi frændi kom og sótti mig og keyrði mig heim til þeirra í Grafarvogi. Ég flaug síðan norður um kvöldið.

En ég er feginn að vera kominn heim. Það er reyndar frekar þröngt hérna, við erum alveg 7 hérna heima núna, 10 ef við bætum köttunum við og hundinum ;).

Annars ætla ég að óska ykkur öllum gleðilegra jóla og vona að þið eigið ánægjuleg jól, ég ætla að reyna hið sama :).

bestu kveðjur

jói

þegar bankarnir voru að meta eigur sínar..

2008-12-08T09:44:00.001-08:00

..hefur trúlega verið einhverveginn svona

þetta hreyfði pínu við mér

2008-11-30T15:36:00.000-08:00

ég að ég hefði hjarta úr stáli

góða nótt....

búinn að skreyta...

2008-11-28T08:52:00.000-08:00

From Strobe lights and blown speakers

nú mega jólin koma í allri sinni dýrð :)

...en þetta er allt í lagi sagði hann, haha og hló, sparkaði og sló...

2008-11-27T14:12:00.000-08:00

..ó, þangað til hún dó....

smá update

verkefnavinna og enn meiri verkefnavinna. Tengist aðalega forritun. Þó það geti verið mjög hvimleitt stundum að forrita þá er það oftast skemmtilegt. Það er svo frábært loksins þegar forritið manns fer að virka, en það getur hinsvegar tekið marga daga.

Ég er búinn að hafa mjög miklar áhyggjur af hvað verður um mig núna að loknu námi. Ég er búinn að ákveða að mig langar ekki í PHd. nám, allaveganna ekki eins og mál standa. Það eru í rauninni bara 3 kostir í stöðunni. Sá fyrsti er að flytja aftur heim og reyna að fá vinnu. Það er ekki alveg útilokað þótt atvinnuleysi sé rosalega mikið. Nýútskrifaðir verkfræðinemar með nýjustu fræði og þekkingu innan handar eru mjög eftirsóttir. Ég myndi helst reyna að fá vinnu hjá Össur eða Marel eða jafnvel hjá Efla þar sem ég var að vinna síðasta sumar (já þeir eru búnir að breyta um nafn). Annar kostur er að taka auka-önn hérna í Chalmers, það eru fullt af kúrsum sem hérna sem mig langar að taka og mér finnst mjög gaman að vera í þessum skóla. Síðasti kosturinn er að flytja til Noregs og fá vinnu þar. Þar er rosalega mikil eftirspurn eftir verkfræðingum og er það nánast öruggt að ég geti fengið vinnu þar. Hinsvegar er mjög erfitt að fá vinnu hérna í Svíþjóð, atvinnuleysi eykst í hverri viku og Volvo eru núna með fjöldauppsagnir nánast í hverjum mánuði.

Þetta veldur mér talsverðum áhyggjum. Líf mitt hefur alltaf verið svo vel planað og komandi 2-3 ár hafa alltaf legið frekar skýrt fyrir. Svosem ekki margar ákvarðanir sem ég hef tekið, bara hvað mig langar að læra og í hvaða skólum ég vil vera en samt engu að síður stórar ákvarðanir. Núna er hinsvegar komin upp sú staða að ég ræð mjög litlu um mína komandi framtíð. Ég veit reyndar að ég er í frekar góðum málum miðað við marga aðra, ég er t.d. ekki að borga af neinum lánum, og er í rauninni ekki með neinar skuldbindingar á bakinu.

Ég er að reyna alltaf að einbeita mér að því að hugsa ekki um þetta en mér finnst það erfitt. Ég ætla að reyna að fara drekka meira ;), drekk til að gleyma.

Allaveganna hér er árangurinn af mínu síðasta forritunarmeistaraverki :)

þetta er plata með gati í miðjunni eins og þið sjáið. Fyrri myndin sýnir hvernig hún er ef ekkert utanaðkomandi álag virkar á hana, seinni myndin er þegar er búið að færa efsta hlutann af henni til hægri. Þetta kannski virkar ekkert áhugavert en þetta eru mjög margar línur af kóða og það tekur um 10 min fyrir tölvuna að reikna þetta. Það verður að hafa færsluna á efri brúnninni í bútum því annars verður lausnins ekki "stöðug" og bara springur.

en ég vona að þið sem eruð að lesa þetta njótið helgarinnar, ég ætla að reyna að finna einhvern/einhverja til að gera eitthvað skemmtilegt með mér. Vonandi Jenga :)

Umferðarljós á Mars?

2008-11-18T13:50:00.000-08:00

Allaveganna eru tveir bílar þar núna (sem eru starfhæfir), Spirit og Opportunity . Núna í mars á næsta ári leggur þriðji bíllinn af stað, hann er ekki kominn með nafn ennþá en núna stendur yfir nafnasamkeppni milli grunnskólabarna í Bandaríkjunum.

Lendingarbúnaðurinn á "bílnum" er alveg byltingarkenndur eins og þið sjáið á þessu myndbandi ef þið nennið að horfa á það og hefur svona lending aldrei verið reynd áður. Bíllinn er ekki búinn sólarcellum til að sjá sér fyrir orku heldur svokölluðu Radioisotope thermoelectric generator. Veit ekki íslenska orðið en þetta er einskonar "batterý" sem notast við geislavirkt efni til að framleiða hita sem framleiðir síðan rafmagn. Þetta er mjög hentugt því á Mars er mikið af sandstormum sem hefta sólargeislana að ná til yfirborðsins. Líka má geta þess að Spirit er alveg að dauða kominn vegna þess hve mikið ryk er búið að setjast á sólarplöturnar og hann hefur enginn úrræði að ná því af.

Mæli með að þið horfið á myndbandið

Google reader í klessu

2008-11-17T12:13:00.000-08:00

Þó svo að Google reader sé að mörgu leyti rosalega sniðugur þá er hann engu að síður að kosta mig rosalega mikinn tíma. Þetta er meira að segja komið á það stig að ég er hættur að hafa undan því sem kemur inn. Gallinn er sá að maður er alltaf að bæta í RSS-feedum en maður tekur aldrei úr, alltaf þegar maður sér sniðugt blogg eða einhverja áhugaverða síðu þá hendi ég henni alltaf þarna inn. Ég ætla að reyna að taka til í þessu núna í vikunni.

Annars er bara allt gott að frétta. Ég er kominn með pínu heimþrá og hlakka rosalega til að fara heim um jólin. Kem 21. des.

Þangað til næst..

ciao

þetta lag lætur mér alltaf líða betur

2008-11-13T03:16:00.000-08:00

það er samt hart deilt um hvort þessi útgáfa sé betri en gamla með Alphaville, mér finnst þessi útgáfa meira "easy on the ear ";)

saturday, oh saturday....

2008-11-09T11:56:00.000-08:00

...how cruel of you to go away

þetta var samt fín helgi, kemur alltaf bara smá leiði í mig þegar þær taka enda

en það kemur önnur helgi eftir þessa helgi

don't panic, be happy eins og Bob Marley sagði alltaf

..fór til Mars til að leita að vatni.......

2008-11-06T10:03:00.001-08:00

...en fann ekki bara vatn heldur líka hamingju. Þetta kom vísindamönnum NASA mjög á óvart en niðurstöðurnar eru ótvíræðar.

Nú er Phoenix hinsvegar að deyja, veturinn færist yfir og það er að verða það kalt á Norðupólnum að rafhlöðurnar virka ekki lengur og hún er föstí "reboot" vítahring, þ.e. hleður batterýin með sólarorku-plötunum í 19 klst. í senn og reynir síðan í örvæntingu að kveikja á sér en getur það ekki og byrjar að hlaða aftur. Hún er hinsvegar búin að þjóna hlutverki sínu og gerði það mjög vel. Ég er búinn að fylgjast mjög náið með þessu verkefni og núna er það nánast búið.

Nú þarf ég að finna mér eitthvað annað til að fylgjast með, eða kannski bara finna mér kærustu ;).

ég hló svo mikið

2008-11-05T13:40:00.000-08:00

When I go forwards you go backwards.....

2008-11-04T09:40:00.000-08:00

....and somewhere we will meet

ég verð að viðurkenna að ég er búinn að vera hálf miður mín undarfarnar vikur út af öllu þessu sem er að gerast á Íslandi. Ég er hættur meira að segja að nenna að fylgjast með þessu, virðist aldrei koma neitt jákvætt í ljós.

En annars veit ég ekkert hvað verður um mig. Ég nenni eiginlega ekki í PHd nám. Það er alveg 5 ár og allir vinir mínir verða farnir í burtu og verð einn hérna eftir. Ég er samt alvarlega að pæla í að vera hérna í eina aukaönn þ.e. þar til jól 2009 og taka einhverja kúrsa bara sem mig langar að taka. Ég ætla samt að fara í atvinnuleit um jólin og gá hvort einhverjir vilja taka við mér. Annars verð ég að fara að grátbiðja um vinnu aftur í Hegningarhúsinu í sumar. Reyndar var ég mjög vel liðinn þar og ég held að ég eigi alveg góða möguleika á að fá vinnu þar aftur.

bið að heilsa ykkur öllum

íbúðin mín

2008-11-02T03:35:00.000-08:00

fann hérna arkitektateikningu af íbúðinni minni

Fireworks and hurricanes....

2008-10-31T09:55:00.000-07:00

Fyrsta vikan búin af önninni, byrjaði fyrsta daginn á því að vera veikur, fór ekkert í skólann. Reyndar er ég eitthvað hálf slappur ennþá meira að segja. Ég ætla bara að taka því rólega um helgina af þeim sökum. Ég er reyndar að fara á morgun að sjá nýju James Bond myndina, ég er mjög spenntur því mér fannst myndin þar á undan rosalega skemmtileg.

lifið heil

þarf bara að læra á morgun..

2008-10-22T15:13:00.001-07:00

og er svo búinn

reyndar gekk mér frekar illa í prófinu síðasta, en ég vona að ég nái, var frekar óheppinn, kom stór spurning úr hlut sem ég hafði ekki lært, og síðan var hitt allt rosalega erfitt

svo er ég líka bara að grínast með allt þetta áfengi á síðunni ;). Bara að hneyksla mömmu. Ég ætla samt engu að síður að halda upp á próflok á föstudaginn, þangað til...

ciao

4 dagar eftir

2008-10-20T12:09:00.000-07:00

síðasta vikan af kvarternum....

2008-10-19T12:29:00.000-07:00

núna er það bara lokaspretturinn, fer í próf á þriðjudaginn og föstudaginn, bæði eftir hádegi, þ.e. 14-18. Ég verð svo feginn þegar þetta er búið, kúrsarnir búnir að vera frekar erfiðið, það svosem tekur ekkert léttara við reyndnar ;).

hérna er smá að því sem koma skal um helgina :)

óskið mér góðs gengis

Lifandi

2008-10-15T09:46:00.000-07:00

jæja, fólk farið að pressa á mig að segja eitthvað hér.

Ég er búinn að vera mjög miður mín út af þessu öllu saman heima á Íslandi undanfarna vikur og þess vegna er ég ekki búinn að vera í bloggstuði.

En allaveganna er allt í lagi með mig. Ég veit ekki hvort ég komi heim til Íslands í vor, ég er að fara tala við prófessor eftir tvær fyrir um PHd nám.

Einn kennarinn minn tók mig afsíðis og talaði við mig daginn sem Kaupþing var tekið yfir og talaði við mig um allt þetta. Ég sagði svosem ekki mikið því ég vissi í rauninni ekki aðmennilega hvað væri að gerast. Hann reyndi að hughreysta mig og sagði að við yrðum örugglega fljót að ná okkur upp úr þessu því við værum svo "homogenious" (samfelld?). Ég skildi reyndar ekki hvað hann átti við með þessu en engu að síður var samt gott að fá hughreystingu (eða kannski var þetta kaldhæðni? ;) ) . erfit að segja þegar ég skildi hann ekki.

En engu að síður þá hef ég ekkert fram að færa sem getur lagað ástandið og ég verð að sætta mig við það. Við verðum bara að bíta á jaxlinn og sjá hvort þetta verður ekki allt í lagi.

Ég er samt feginn að vera ekki í þessum "bankabransa". Örugglega fullt af örvæntingarfullum viðskipta og hagfræðinemum núna sem eru að reyna að skipta um brautir í háskólum Íslands.

En góðu fréttirnar eru núna að héðan í frá liggur leiðin bara upp á við. Ég sagði þetta í gær reyndar líka en svo sagðir Glitnir 100 manns upp þannig að ég hefði átt að bíða með þessar yfirlýsingar mínar. Mér skilst að Björgvin G. viðskiptaráðherra hafi reynt að fá Skralla trúð til að segja upp öllu þessu fólki hjá bönkunum til að "minnka shockið" en Geir H. taldi að það væri heppilegra að fá Flosa Ólafs. Ekki náðist samkomulag um þetta og þess vegna var bara ákveðið að segja fólkinu bara upp með SMS.

Annars er quarterinn búinn eftir næstu viku, hlakka mikið til.....

þangað til næst

ciao

Blankur...

2008-10-01T14:45:00.000-07:00

...en engu að síður mjög ríkur

From Strobe lights and blown speakers

It's the end of the world as we know it....

2008-09-29T13:30:00.000-07:00

.... and I feel fine....

eða svona

Þetta er mjög dökkur dagur í íslenskri fjármálasögu og ég er viss um þessa dags verði minnst næsta áratuginn.

Ég finn fyrir því mjög mikið hvað krónan er búin að falla, þegar ég kom hérna fyrir ári síðan var 1 sænsk króna 9 íslenskar, en núna eru 1 sænsk króna 15 íslenskar. Reyndar eru námslánin mín í sænskum krónum þannig að þau breytast ekki, en engu að síður þarf ég að borga þau aftur í íslenskum. Ég er búin að vera frekar leiður yfir þessu í dag en ég ætla að reyna að horfa á björtu hliðarnar á þessu. Þetta þarf ekki að vera það slæmt, ég bara eyði minni pening, hætti að fara í bæinn um helgar, miklu ódýrara bara að hittast heima hjá einhverjum um helgar. Ég ætla að reyna að hætta að hugsa um þetta bara, hef svosem nóg af öðrum hlutum til að hafa áhyggjur af ;).

Ég er búinn að velja mér Masters-verkefni. Það fjallar um brautarteina og þreytu í samskeytum á þeim. Er viss um að það verði mjög skemmtilegt. Ég fæ aðstöðu í skólanum til að skrifa það, þ.e. tölvu og einhverskonar skrifstofukrók. Ég fæ einnig smá pening fyrir að skrifa það, sænskar kr ;).

hérna er smá myndband sem bræddi hjarta mitt

vona að þið hafði það gott

haha

2008-09-25T05:29:00.000-07:00

ég hló svo mikið

Updeit

2008-09-18T11:14:00.000-07:00

Ég er búinn að vera frekar upptekinn undanfarið, mikið að gera í skólanum og svo er ég líka að velja mér efni fyrir masterverkefnið mitt til að skrifa um á næsta ári. Svo hef ég líka verið upptekinn við að horfa á sjónvarpið á kvöldin ;).

Ég er loksins búinn að innrétta íbúðina mína eins og ég vil hafa hana. Er búinn að setja 4 myndir á veggina líka, gerir alveg rosalega mikið fyrir íbúðina. Ég skal reyna að henda inn myndum hérna við tækifæri.

Annars er ég búinn að vera mjög leiður yfir efnahagslífinu heima á Íslandi. Skil ekki alveg hvernig þetta gat farið í klessu á svona stuttum tíma. Þetta snertir mig frekar mikið, ég sé sumarkaupið rýrna með hverjum deginum. Reyndar aukast námslánin því ég fæ þau í sænskum krónum svo það skiptir málið gengið þann dag sem ég fæ námslánin. Það þýðir samt ekkert að væla út af þessu, peningar gera mann víst ekki hamingjusaman.

Það sem spilar líka inní þetta að það er ekkert mjög heillandi að fara á vinnumarkaðinn á Íslandi þegar þetta er svona eins og það er. Maður ætti kannski bara að skella sér í doktorsnám? Dr. Jói ? Veit ekki hvort það passi við mig.

læt þetta duga í bili.
helgin framundan

bestu kveðjur

Hratt af stað

2008-09-02T11:05:00.000-07:00

Skólinn byrjar með hvelli, búinn að fara í þrjá fyrirlestra og mér sýnist ég ekkert hafa mikinn frítíma aflögu frekar en venjulega. Annars er ég bara sáttur við stundatöfluna, fæ oftast frí á föstudögum og um næstu helgi fæ ég meira að segja 4 daga helgi. Ég er í tveimur kúrsum, einn heitir Advanced material mechanics og hinn heitir Structural Dynamics. Ég er nokkuð ánægður með þá enn sem komið er þó þetta sé bara rétt byrjað.

Ég fór á fótboltaleik í gær á Ullevi með Bjössa vini mínum . Ullevi er stærsti fótboltavöllur og Svíþjóð. Ég reyndar vissi ekkert hvaða lið voru að fara keppa fyrr en ég mætti en það innanbæjarlið sem mættust og fór leikurinn 1-0. Kannski ekkert frábær leikur, líka hellirigning á tímabili. Þetta var samt fín upplifun.

Ætla að fara að hvíla mig, þarf að mæta kl 8 í fyrramálið.

Gautaborg (director's cut)

2008-08-30T11:07:00.000-07:00

Ég kom hingað aftur til Gautaborgar síðastliðinn miðvikudag. Ferðin gekk mjög vel fyrir utan hvað mér þótti rosalega erfitt að vakna kl. 3:45. Gunna frænka var svo elskuleg að vakna með mér og keyra mig á völlinn. Flugið gekk alveg mjög vel og við græddum 30 min vegna meðvinds.

Annars var allt hérna eins og áður. Íbúðin mín reyndar lyktaði eins og holræsi vegna þess að allt vatn var búið úr vatnslásunum, líka úr klósettinu. Er að vinna í að laga það núna, hafa kveikt á ilmkertum og lofta vel út.

Er loksins búinn að raða í íbúðina mína eins og ég vil hafa hana held ég, eða allaveganna svona í bili. Þarf bara að finna eitthvað á veggina mína, alveg eins og í einangrunarklefa hérna.

skóli á mánudaginn, kveð í bili

ciao

Hvað er að gerast í lífi Jóa

2008-08-23T04:16:00.000-07:00

Síðasti dagurinn í vinnunni í gær, mjög blendnar tilfinningar. Ég eyddi fyrri hluta dagsins að taka til á skrifborðinu og í tölvunni og síðan í hádeginu fór allt starfsfólkið upp í eldhús og við horfðum á handboltann, Línuhönnun bauð upp á pizzur og það var frábær stemming. Eftir leikinn ákvað að ég að drífa mig heim og kvaddi alla í tilefni þess. Yfirmenn mínir sögðu að þau vildu endilega fá mig aftur næsta sumar og mun ég tala við þá um jólin um tilvonandi fastráðningu. Ég er mjög feginn að hafa fengið vinnu þarna í sumar, frábær vinnustaður og frábært fólk sem vinnur þarna.

Annars þarf ég bara að fara að huga að því að fara pakka, flýg aftur til Gautaborgar á miðvikudaginn. Það verður frekar auðvelt að pakka í þetta skiptið því ég nennti ekki að taka upp úr töskunum í vor þegar ég kom, þarf bara að pakka hjólinu aftur niður.

annars er menningarnótt á eftir, fer á tónleikana á Miklatúni með einhverjum vinum mínum

heyri í ykkur

Það eru allir hamingjusamir nú til dags.....

2008-08-01T14:28:00.000-07:00

vona að þið eigið góða helgi

pretty fly (for a white guy)

2008-07-21T14:38:00.000-07:00

líf mitt hefur sjaldan verið eins straumlínulagað og það er núna, bara vakna==> hjóla==> vinna==> hjóla(ég hjóla í vinnuna)==> hanga í tölvu==> borða==> horfa á sjónvarp==>sofa. Þetta er samt alls ekkert slæmt, gott líka að hafa meiri frítíma heldur en þegar ég er í skóla.

Ég fór í gær með Sigga frænda upp á Esjuna. Planið var að fara á laugardaginn en ég guggnaði vegna þynnku og almennrar vanlíðan á laugardagsmorguninn. Ferðin gekk mjög vel og við fengum ágætis veður meirihlutann af leiðinni. Ég finn reyndar að ég er í miklu betra formi núna heldur en þegar ég labbaði hana síðasta sumar og ég finn varla fyrir því núna í dag að ég hafði labbað svona mikið í gær. Síðasta sumar var ég alveg með strengi í viku eftir. Ég ætla að reyna að fara aftur í sumar ef tími gefst.

Ég pantaði flugfar heim um verslunarmannahelgina. Ég flýg á fimmtudagskvöldið og kem aftur suður á mánudaginn keyrandi. Ég hlakka til að eyða smá tíma með fjölskyldunni, hef eiginlega ekkert hitt hana þetta árið.

Ég er líka búinn að panta flugfar til Gautaborgar , ég flýg þann 27. ágúst. Ég hlakka til að fara aftur að mörgu leiti. Mér finnst bara skrýtið að næsti vetur verður minn síðasti vetur í skóla að öllum líkindum.

ætla að leggja mig,

ciao

crappy gæði,

2008-07-13T10:13:00.000-07:00

en frábært lag
nýtt frá Radiohead

Erfið vika

2008-07-08T15:06:00.000-07:00

ég vaknaði áður en klukkan mín hringdi á mánudaginn, ákvað bara að drífa mig snemma í vinnuna. Ég kom fyrstur í vinnuna og var svo upptekinn að hlusta á "The ting tings" að ég heyrði ekki þegar þjófavarnakerfið fór að telja niður og biðja mig um að slá inn leyninúmerið, og auðvitað fór það í gang. Ég náði samt að redda þessu nokkuð vel, náði að slökkva strax á þessu og hringdi síðan í Securitas og sagði að ég hefði náð að yfirbuga þjófinn.

Ég var ekki með neitt verkefni í gær og var hálf pirraður yfir því að hafa ekkert að gera. Það reyndar rættist aðeins úr deginum þegar ég fór í góðra vina hópi á Pizza hut. Ég reyndar borða alltaf yfir mig þegar ég er þar og var hálf dofinn sem var eftir var dags og einnig það að ég hafði ekkert að gera.

Loksins í dag fékk ég verkefni, held reyndar að þetta sé dáltið stór biti til að kyngja en ég vona að ég reddi þessu, er reyndar ekki alveg viss einu sinni hvað ég á að gera en vonandi að það skýrist næstu daga.

Annars hef ég verið að berjast við að halda kúlinu í allan dag, það var svo frábær Venture Bros. þáttuirnn í gær og ég var að hugsa um hann í allan dag og var alltaf að fara skella upp úr.

mæli með þessu

vikulok

2008-07-04T09:28:00.001-07:00

er nýklipptur, var kominn með rosalega mikið hár, finnst eiginlega núna hjólahjálmurinn minn verða orðinn of stór á mig.

Vikan er búin að vera fín, lítið reyndar að gera í vinnunni, er samt núna með eitthvað hús sem ég er að dunda mér við að fara yfir teikningar og telja íhlutina í. Það eru eiginlega allir í sumarfríi núna og enginn til að segja okkur fyrir verkum.

Annars er ég búinn að vera að sofa alltof lítið undanfarið, er alltaf rosalega syfjaður. Þetta stafar af því að ég fer seint að sofa og vakna snemma, ég ætla að reyna að laga þetta í næstu viku, er alveg orðinn veikur nánast í vikulok.

Annars er helgin óplönuð, vonandi tek ég því bara rólega

en allaveganna

Ciao

Gerðu vinnuna skemmtilegri...

2008-06-23T15:36:00.000-07:00

Ég er alltaf að reyna að leita leiða til að gera vinnuna mína skemmtilegri, ekki það að vinnan mín sé neitt leiðinleg, það er bara alltaf hægt að gera eitthvað skemtilegt ennþá skemmtilegra.

Ég vinn eiginlega bara með teikningar allan daginn og á þeim er stundum persónur til að lífga upp á myndirnar. Ég er farinn að skíra persónurnar og gefa þeim smá forsögu.

Tökum dæmi

Hérna er Kalli kúreki. Kalli byrjaði ungur að drekka vegna hópþrýstings frá félögum sínum í grunnskóla en það var samt ekkert vandamál fyrr en hann byrjaði í framhaldsskóla. Hann lagði stund á steinsmíði en flosnaði fljótlega upp úr því vegna drykkju og spilakassafíknar. Hann missti fljótt tengls við vini og fjölskyldu eftir að hafa logið ítrekað að þeim til að ná út úr þeim pening fyrir áfengi. Þegar einmannleikinn tók yfirhöndina leiddist hann út harða morfínneyslu og endaði loks á götunni vegna peningaleysis. Hann framdi nokkrar mislukkaðar ránstilraunir þar á meðal vopnað rán í BM-Vallá en það eina sem hann uppskar úr því voru tveir kantsteinar sem voru síðan teknir af honum við handtöku. Stærsta ránið sem hann framdi var þegar hann ætlaði að stela heilum gámi af PS3 tölvum. Hann leigði gámaflutningabíl af gámaflutningabílaleigunni og fór niður á bryggju til að stela gámnum sem hann hafði heyrt að væri að koma frá starfsmanni í BT. Hann endaði með því að taka vitlausan gám og sat uppi með 9670 garðálfa. Það komst upp um hann þegar hann labbaði húsi úr húsi í Garðabæ til að reyna selja fólki ódýra garðálfa og hlaut hann 6 ára fangelsisdóm fyrir. Hann byrjaði að afplána dóminn á Hegningarhúsinu Skólavörðustíg og fór 3 mánuðum seinna á Litla-Hraun. Á Hrauninu ákvað hann að taka sig á í lífinu, fór að mæta á AA-fundi, stundaði líkamsrækt og tók alla vinnu sem honum bauðst. Hann fékk síðar að fara á Kvíabryggju vegna góðrar hegðunnar og var þar í tvö ár og gekk honum allt í haginn. Kalli sat inni á sama tíma og Árni J. og eru þeir vinir enn þann dag í dag. Árni kenndi Kalla öll 4 gripin sem hann kunni á gítar og í staðinn kenndi hann Árna steinsmíði. Síðustu 6 mánuðina af dómnum fékk hann að afplána á Byrginu. Þar frelsaðist hann og fékk sér kúrekahatt til að líkjast átrúnaðargoði sínu honum Guðmundi hefur alla tíð síðan verið kallur Kalli kúreki. Í dag vinnur Kalli við forvarnarstarf fyrir SÁÁ og semur tónlist í frístundum með gripunum 4 sem hann lærði í afplánunni.

Með því að leggja smá stund í það að semja bakgrunn fyrir þetta "módel" gerir hann miklu áhugaverðari fyrir vikið og styttir vinnudaginn ;).

17, júní

2008-06-17T07:38:00.000-07:00

ákvað að blogga í tilefni dagsins.

dagurinn byrjaði á því að ég vaknaði við Simba þegar hann var að leika sér að gluggatjöldunum. Það var reyndar allt í lagi því ég þurfti hvort sem er að skreppa aðeins í vinnuna. Það var rosalega fámennt í vinnunni en ég náði samt alveg að koma helling í verk.

Annars er lífið frekar straumlínulagað, vinna, hjóla, sofa og borða. Mér líkar þetta mjög vel samt.

Veðrið er ekkert búið að vera spes síðan ég kom til Reykjavíkur og hef ekkert mikið nennt að hjóla nema í og úr vinnu. Ég fékk mér reyndar fína hjólatúra um helgina.

Ég er að fara að labba Esjuna núna um helgina með Sigga, ég vona bara að það verði gott veður. Ég held líka að ég sé í betra formi núna heldur en síðasta sumar þannig að ég vona að þetta verði ekkert mál.

bestu kveðjur í bili, ætla að reyna að fara gera eitthvað meira í næstu viku þannig að ég hafi frá einhverju að segja

ciao

norður

2008-06-06T10:07:00.000-07:00

ég kom norður í gær um 23 leytið.

Vinnuvikan búin að vera frekar bussy og allt komið í drasl á skrifborðinu mínu.

Það eru allir búnir að vera frekar uppteknir hérna á heimilinu að undirbúa veisluna á morgun þannig að ég er búinn að vera bara að hanga í tölvuleik. Tölvuleikurinn heitir "The world ends with you" fyrir Nintendo DS og er frá fyrirtækinu Square Enix. Það kom mér eiginlega á óvart hvað þetta er frábær leikur, grafíkin er góð , artworkið er frábært og tónlistin alveg framúrskarandi. Ég á samt eftir að spila hann meira til að geta dæmt spilunina og söguþráðinn. Ég er ekki alveg búinn að ná að skilja alveg hvernig bardagarnir virka en þetta kemur.

Það verður fullt af fólki hérna heima í nótt og ég sé fram á að ég þurfi að sofa í eldhúsinu, þetta kemur samt í ljós.

í lokin er hérna ein mynd af nýjasta fjölskyldumeðlimnum henni Selmu

vinna

2008-06-03T13:52:00.000-07:00

ég byrjaði að vinna í gær. Fyrsti dagurinn var frekar easy en í dag voru engin vettlingatök. Ég er með mitt eigið skrifborð og glænýja tölvu. Mér líkar þetta bara vel, það er samt pínu leiðinlegt eins og í dag að vera inni í tölvunni þegar veðrið er svona rosalega gott. Mér líkar samt rosalega vel við fólkið þarna og það er góður starfsandi þarna. Þetta leggst vel í mig allaveganna. Ég ætla ekki að vera held á MSN í vinnunni, þið verðið bara að senda mér tölvupóst ef þið viljið ná í mig.

Litla systir mín er að fermast um næstu helgi þannig að ég ætla að drífa mig norður, ég fer trúlega á fimmtudaginn en það kemur í ljós á morgun.

ætla að leggja mig
heyrumst

Heim á leið

2008-05-31T10:53:00.000-07:00

flýg heim á morgun

er að pakka því síðasta niður, ég á eftir að gleyma alveg helling en það verður að hafa það.
Ég hlakka mjög mikið þetar ég loksins kemst í Grafarvoginn. Ég er búinn að fá far niður á flugvöllinn, og það er í vinnslu að fá frá Keflavík.

Ég hlakka til að sjá ykkur öll, ætla að pakka meira niður

ciao

Eurovision og fleira

2008-05-25T11:33:00.000-07:00

ég fór í Eurovision partý í gær ásamt nokkrum Íslendingum sem eru hérna í Gautaborg . Það var mjög gaman, samt pínlegt að hlusta á sum lögin þarna. Íslenska lagið var allt í lagi að mínu mati, ekkert framúrskarandi en með grípandi takt og allt í lagi sungið.

Ég er að fara í próf á þriðjudaginn. Ég er orðinn ógeðslega leiður á þessum kúrsi, hann heitir Fatigue Design (þreytuhönnun ) og er í stuttu máli bara súpa af empirískum formúlum , gröfum og töflum sem maður þarf að reyna púsla saman upplýsingunum úr til að leysa dæmin.

Það styttist líka í heimferð. Ég er farinn að hlakka roselega til þó svo að mér leiðist mjög millilandaflug og öllu því veseni sem því fylgir.

Ég ætla að reikna aðeins meira

heyri í ykkur

Allt að klárast

2008-05-21T14:50:00.000-07:00

ég var að klára síðasta verkefni vetrarins í þessum töluðu orðum. Það er búið að vera ógeðslega mikið að gera, síðasta sunnudag fór ég ekki að sofa fyrr en klukkan 5:00 um nóttina og mætti síðan í fyrirlestur klukkan 8:00. Við vorum að klára hópverkefni þannig að við gátum ekki farið að sofa fyrr.

Annars er ég bara nokkuð hress. Ég er farinn að hlakka til að komast heim að vinna.
Ég er rosalega feginn að vera hættur á þessu vaktavinnu rugli, þó þetta hafi gefið fínar tekjur þá vóg það ekki á móti því hvað manni leið illa stundum, líkamsklukkan fór alveg í rugl.

Ég fer í próf á þriðjudaginn og síðan er ég alveg búinn. Eftir það þarf ég að hreinsa íbúðina og pakka öllu dótinu mínu niður sem ég ætla með til Íslands, þar á meðal hjólið mitt sem ég þarf eitthvað að taka í sundur fyrir flutningana.

Ég veit að það verður alveg slegist um að sækja mig á flugvöllin þegar ég kem þannig að ég verð bara að setja allar umsóknirnar í pott og draga vinningshafann, þið getið sent mér skilaboð á facebook þeir sem vilja vera með í pottinum ;).

ég ætla að fara að sofa
bið að heilsa

Brjálað að gera

2008-05-14T13:34:00.000-07:00

það er rosalega mikið að gera í skólanum núna, verkefnaskil og læti. Ég er orðinn rosalega lúinn og þreyttur en þetta er alveg að verða búið.

Hérna er mynd handa ykkur
Þetta er yngsta sprengistjarna í Vetrarbrautinni, sprakk árið 1868. Röntgengeisla sjónaukinn Chandra frá NASA tók þessa mynd.

Söknuður

2008-05-10T10:04:00.000-07:00

Ég er pínu farinn að sakna fjölskyldu minnar. Hérna eru systur mínar þrjár í afmælinu hjá pabba mínum um síðustu helgi. Það eina sem vantar á þessa mynd er 1stk ég, eða jafnvel tvo því það er aldrei hægt að fá nóg af mér ;).

Ég fer samt alveg að koma heim, veit að allir bíða spenntir

Iron Man

2008-05-05T12:49:00.000-07:00

Ég skellti mér á myndina Iron Man ásamt Palla síðasta föstudag. Ég fór undir því yfirskini að þetta væri heimildarmynd um Gumma í Byrginu og var ánægður að sjá þegar myndin byrjaði að Robert Downey Jr. lék aðaðhlutverkið. Ég fattaði samt þegar myndin var hálfnuð og Guðmundur hvergi sjáanlegur að þetta væri ekki heimildarmynd. Engu að síður mjög góð mynd og ég er mjög ánægður með handritið. Það vill oft verða að svona ofurhetjumyndir séu fyrirsjáanlegar og klysjukenndar en það var ekki tilvikið í þessari mynd eða allaveganna ekki fyrstu 4/5 hluti hennar. Tæknibrellurnar voru mjög góðar og greinilega mikil vinna og peningur lagður í sviðsmyndina. Eftirvinnslan var til fyrirmyndar og skilaði krafturinn sem Iron man bjó yfir vel til til áhorfenda. Mæli með að þið kíkið á þessa mynd. Ég gef henni fjórar stjörnur af fimm.

Það er mikið að gerast í ofurhetjumyndunum núna, Hulk og Batman koma í kvikmyndahús núna í sumar, bíð spenntur.

mig langar i svona

2008-05-05T07:59:00.001-07:00

kettir alltaf fyndnir

2008-05-03T04:40:00.000-07:00

Flutningar

2008-04-29T14:16:00.000-07:00

Ég er að flytja 1. júní næstkomandi. Ég flyt ekki langt samt, bara upp um 7 hæðir í blokkinni minni. Allir eru velkomnir í þrif-partý þann 30. maí og verður þrifið fram eftir nóttu.

Ef þið vitið um einhvern sem er að fara til Gautaborgar í sumar og vantar stað til að gista á endilega hafið samband

en ég ætla að leggja mig, heyri í ykkur

ciao

góður dagur

2008-04-27T13:49:00.000-07:00

nenni ekki að raða myndunum hérna inn

þið getið skoðað hérna

Ég er nærri því með tvær háskólagráður.......

2008-04-22T14:21:00.000-07:00

..en engu að síður tókst mér að klúðra þessu

Búinn að laga standinn á hjólinu og setja hann á aftur.....

neineineinei.........

en á endanum tókst þetta :)

Nobody left behind

2008-04-21T13:16:00.000-07:00

Það er alltaf pláss fyrir nokkra Japani í viðbót

helgi

2008-04-20T07:00:00.001-07:00

Helgin er búin að vera nokkuð góð. Í gær var alveg frábært veður og ákváðum við að nota tækifærið ég , Páll A. og Sveinbjörn að reyna að fara að skoða flugvélasafn hérna rétt fyrir utan borgina. við komumst að því að það væri lokað þegar við komumst loksins á áfangastað þannig að stefnan er tekin á að fara á sunnudaginn eftir viku. Mig grunaði þetta samt sterklega allan tímann að það væri lokað því á heimasíðunni stóðu tímasetningar fyrir "guided tours" en ekkert um aðra opnunartíma. Það voru bara "guided tours" þannig að við fengum ekki að sjá neinar flugvélar í þetta skiptið. Engu að síður var þetta fínn rúntur, veðrið var gott og líka gaman að sjá ný svæði hérna af Gautaborg.

Bjössi hélt partý í gær og heppnaðist það bara vel, frekar róleg stemming. Ég fór samt ekki að sofa fyrr en klukkan 5 og er því eiginlega alveg að deyja úr þreytu í dag.

bið að heilsa öllum í bili

Stand up

2008-04-17T07:10:00.000-07:00

Þetta er opnunarbrandarinn minn fyrir stand-up túrinn minn um Bandaríkin næsta sumar sem kallast "Jói-safe with most medications"-"summer 2008"

allaveganna er fyrsti brandarinn:
"I always wanted to be a concept artist for NASA"

í augnablikinu er þetta eini brandarinn í prógraminu en byrjunin lofar góðu,

Vísindaferð (mínus bjór)

2008-04-14T13:34:00.000-07:00

Ég fór í dag í ferð með skólanum að heimsækja SP í Borås sem er bær ca. 40-50 min akstri frá Gautaborg. SP er svona eins og Rannsóknarstofnun Iðnaðarins á Íslandi, þeir taka að sér allskonar verkefni fyrir fyrirtæki og ríkið t.d. eins og árekstrarpróf fyrir hjálma og bíla, þreytuprófum á vélahlutum, jarðskjálftaprófanir, bergmælingar og margt margt fleira. Þetta var rosalega spennandi og að sjálfsögðu tók ég myndavélina með mér. Það var bara sagt við okkur að það væri harðbannað að taka nokkrar myndir þarna þannig að það féll um sjálft sig. Ég var samt rosalega þreyttur í morgun og ég svaf allan tímann í rútunni á leiðinni.

Ég er annars búinn að vera mjög duglegur í ræktinni síðustu tvær vikur og ég stefni á það í sumar vonandi að hjóla yfir Laugaveginn ásamt vinum mínum (Haukur E. og Daði Freyr). Það stefnir allt í það að ég treysti mér í það en þetta tekur víst um 6 tíma að hjóla hvora leið.

Annars var helgin bara róleg. Sveinbjörn og Ragnar héldu grillpartý á föstudagskvöldið og heppnaðist það mjög vel og var endað á því að fara í Actionary sem ég er frekar slappur í en gat huggað mig við það að ég var ekki alveg jafn ömurlegur og sumir aðrir þarna. Á laugardaginn fór ég með fríðu föruneyti í bíó á myndina 21 og var hún bara mjög fín, pínu klisjukennt sumt en annars bara ágæt.

Ég ætla að taka einhverjar myndir á morgun ef það verður gott veður, set þær á bloggið.

Ciao

Uppgefinn...

2008-04-07T13:54:00.000-07:00

ég var að koma úr ræktinni úr 90 min spinning og ég er alveg búinn. Þetta var samt rosalega gaman, góð tónlist og mikið "kick" sem maður fær út úr þessu.

Annars er önninn bara byrjuð á fullu. Ég er í tveimur kúrsum eins og alltaf, einn þeirra heitir "Fatigue design"(þreytuhönnun) og hinn heitir "project course" (verkefnakúrs) . Í verkefnakúrsnum var okkur raðað í hópa og eigum við að reikna eitthvað í sambandi við skorsteina, vindálag, hitaútþenslu, þreytubrot og helling af einhverju dóti. Þessi önn leggst bara vel í mig og í vor fer ég bara í eitt próf, þann 27. maí.

Ég er búinn að panta far til Íslands þann 1. júni og fer trúlega bara að vinna 2. júní. Í sumar verð ég búsettur í Grafarvoginum hjá Gunnu frænku minni og leggst það mjög vel í mig. Ég verð bíllaus þannig að ég vona að það verði gott veður þannig að ég geti hjólað sem mest til og úr vinnu, en eins og flestir vita þá verð ég að vinna hjá Línuhönnun í sumar

Ég var í Hagkaup um páskana og sá þessi "villtu dýr" í leikfangadeildinni og ákvað að smella mynd af þessu með símanum mínum

Allaveganna standa undir nafni ;)

bestu kveðjur Jói

1. apríl

2008-04-01T13:01:00.000-07:00

Ég er búinn að vera rosalega var um mig í dag enda ekki að ástæðulausu eins og titill þessarar bloggfærslu gefur til kynna. Ég hljóp oft 1. apríl á mínum yngri árum en hef ekki gert það síðustu ár þangað til í fyrra. Ég var að læra á bókasafninu upp í VR-2 og ég var búinn að vera allan morguninn að leita að 1. apríl göbbum í helstu fjölmiðlum og taldi mig vera nokkuð skarpann að geta fundið jafn mörg og ég gerði. Meðan ég var að vafra sendi Siggi frændi mér SMS og sagði að hann væri loksins búinn að manna sig upp í það að kaupa PS3 og bauð mér að koma í heimsókn að prófa gripinn. Það lifnaði yfir mér öllum því ég hafði aldrei prófað PS3 og gaf skít í heimalærdóminn dreif mig yfir til hans. Þegar ég kom inn þá sagði Siggi við mig ,, Þú veist hvaða dagur er í dag?" og ég sagði ,,já ég veit það, það er 1. apríl ". Það tók mig nokkrar sek. að skilja að það var aldrei nein PS3 tölva til að byrja með og fannst ég vera algjör auli að hafa ekki einu sinni grunað þetta á neinum tímapunkti. Ég skil núna hvernig barnaníðingunum í Kompási líður þegar þeir eru gómaðir, þeir eru alveg blindir á það augljósa að það sé verið að leiða þá í gildru vegna þess hvað löngunin er sterk (nema náttúrulega mín löngun er í tölvuleiki, ekki börn)

Allaveganna þá var ég ekkert plataður í dag (held ég)

ætla að leggja mig
Ciao

Kominn aftur "heim"

2008-03-30T13:37:00.000-07:00

þið verðið að afsaka þetta bloggleysi um páskana, það var bara ekkert til að segja frá.

Ég afrekaði ekki neinu merkilegu í páskafríinu, ég var meirihlutann af fríinu fyrir norðan hjá fjölskyldu minni en síðan á síðasta þriðjudag fór ég til RVK og var þar þangað til að ég fór.

Ferðin hingað gekk mjög vel, Viðar hetja sótti mig um 5:30 og keyrði mig til Keflavíkur. Ég lenti á Kastrup um 13 leytið að staðartíma. Þaðan tók ég lest til Malmö og síðan frá Malmö til Gautaborgar, og var kominn hingað klukkan 18 að staðartíma.

Það er skóli í fyrramálið, "Fatigue design " klukkan 8:00 þannig að ég neyðist til að fara að leggja mig.

Bið að heilsa öllum,

búinn

2008-03-12T10:04:00.000-07:00

það er svo frábært að vera búinn í prófum, ég hata próf, sef svo lítið og er alltaf alveg ónýtur eftir hverja próftíð. Mér gekk bara sæmilega held ég í þessum tveimur prófum sem ég fór í. Ég er samt ekki alveg sloppinn því á morgun þarf ég að fara heim til Íslands. Planið er að vakna klukkan 5 í fyrramálið og fara í sturtu og borða. Því næst þarf ég að taka sporvagn niður á lestarstöð og ég fer þaðan klukkan 6:30 og fer á Kastrup í Danmörku. Síðan flýg ég með Iceland Air og er planið að lenda klukkan 15:30 í Keflavík. Síðan á ég pantað flug klukkan 19 norður og ætlar Þórir frændi minn að fá að koma með mér (eða ég með honum?). Ég vona bara að þetta gangi allt upp. Aðal óvissuþátturinn er hvort ég nái að vakna í fyrramálið því ég er alveg útkeyrður núna.

Ég ætla að fara að pakka, ég hlakka til að sjá ykkur

kveðja Jói

Google reader

2008-03-06T12:55:00.000-08:00

Ég hef notað forritið Google reader í um það bil ár og finnst það verða betra og betra með hverjum deginum enda eru Google mjög frægir fyrir það að gera góð forrit. Ég mæli með að þið tékkið á þessu. Hérna hægra megin á síðunni minni mun nú birtast fréttir sem ég hef merkt sem áhugaverðar í google reader. Ef þið fáið ykkur google reader þá endilega addið þið mér sem vini, í augnablikinu er Gestur eini vinur minn þar.

Annars eru öll verkefni búin og nú er bara próflestur, próf á þriðjudag og miðvikudag og síðan kem ég bara til Íslands á fimmtudaginn, hlakka til að sjá ykkur öll,

ciao

Does it really matter?

2008-03-01T08:27:00.001-08:00

Ég var að fá mér áskrift að tímaritinu Popular science og ég fékk fyrsta eintakið núna í vikunni. Þetta er fínt blað með fullt af áhugaverðum greinum. Það sem fer samt mest í taugarnar á mér hvað eru margar auglýsingar í því. Sumar auglýsingarnar eru að kynferðislegum toga eins og myndin hérna að ofan, þar á meðal er verið að auglýsa viagra og jafnvel hormónið Pheromone sem á víst að láta mann fá meira "Sexual appeal" ef maður ber það á sig. Einnig er verið að auglýsa fullt af fleiri lyfjum, svefnlyf ,geðlyf og einhverjar vítamínblöndur. Ég væri til bara í að borga meira fyrir blaðið og fá að sleppa auglýsingum.

Nýr köttur

2008-02-21T12:40:00.000-08:00

Mamma og pabbi ákváðu að það væri kominn tími til að fá sér annan kött. Hún fékk nafnið Selma og er hérna hægra megin á myndinni. Hinn kötturinn heitir Pétur og hann er held ég orðinn 5 ára gamall. Pétur er mjög undarlegur í alla staði og sefur mjög oft á bakinu eins og sést á þessari mynd. Ég er farinn að hlakka til að sjá Selmu í páskafríinu

Mikið að gera

2008-02-20T13:09:00.000-08:00

Það er allt að gerast í skólanum núna. Önnin að fara klárast og síðan bara að koma próf

Hérna er líkan af Hoover-stíflu í USA sem ég og Ali vinur minn forrituðum. Vatnið á að vera hægra megin. Það sem kom mest á óvart að það munar eiginlega engu hvort vatnið sé eða ekki upp á spennur og færslur því stíflan sjálf er svo þung.

ég skal blogga meira á föstudaginn og hef þá vonandi eitthvað merkilegt að segja

ciao

Across the universe

2008-02-16T02:45:00.000-08:00

Across the universe er búið að vera eitt af mínum uppáhaldslögum síðan ég var 6 ára. NASA var núna í síðustu viku að útvarpa laginu í áttina að Pólstjörnunni og mun það ná áfangastað eftir um 430 ár. Hérna er Across the universe í flutningi Rufus Wainwright, ég held að þetta sé Dakota Fanning sem leikur í myndbandinu en ég er ekki alveg viss.

Annars stefnir þetta bara í góða og rólega helgi. Við fórum á einhvern lítinn bar hérnra rétt hjá í gærkvöldi og var það mjög gaman framanaf.

Ég vona að þið eigið góða helgi

home again

2008-02-11T14:30:00.000-08:00

ég var að panta flug heim um páskana. Ég flýg frá Danmörku þann 13. mars og flýg síðan aftur til baka þann 30. mars. Núna þarf ég bara að redda mér til Danmörku og ætla ég að panta lestarfar í vikunni. Í þetta skipti ætla ég að eyða öllu fríinu mínu norðan heiða og ég er að krossa fingur fyrir því að það verði gott veður.

Er annars bara búinn að vera mjög kvefaður, var alveg frá í nokkra daga í síðustu viku. Mætti samt alltaf í skólann, afrekaði samt ekkert miklu.

Nasa er að velja nafn á nýjasta sjónaukann þeirra. Þetta er gamma-geislunar sjónauki og er tilgangur hans að fræðast meira um "dark matter" í heiminum. Í vetrarbrautinni okkar er um 10x meira "dark matter" heldur en sýnilegt efni. "Dark matter" er bara hægt að sjá út frá þyngdaráhrifunum sem það veldur í kringum sig og er þetta fyrirbæri mjög undarlegt og illskiljanlegt ennþá. Hægt er að velja nafn hérna. Ég ætla að leggja til að það verði skýrt "Bubbli" sem er samblanda af Hubble og Bubbi og tel ég að það ætti að auka áhuga almennings á stjörnufræði með að nefna sjónaukann eftir dægurlagakóng Íslands. En samt svona alvöru veljið eitthvað flott, er búinn að hugsa mikið um þetta og finn ekkert sniðugt.

bið að heilsa í bili.

ps. þið megið líka segja mér hvað "dark matter " er á íslensku

Febrúar

2008-02-05T12:11:00.000-08:00

verkefnavinnan komin á fullt og hérna er smá afrakstur af tölvuforriti sem ég og Ali vinur minn gerðum

þetta er hitavandamál og sýnir myndin hvað hluturinn er heitur á mismunandi stöðum í °C. Þó myndin sé ekki mjög tilkomumikil þá var hellings vesen að fá þetta til að virka.

Helgin var mjög fín, á föstudagskvöldið fóru ég og Haukur að hitta nokkra Íslendinga á pöbb hérna í miðbænum. Þó fólk þarna hafi hagað sér misvel þá var þetta engu að síður mjög gaman.

á laugardaginn fór ég síðan í partý til Íslendinga í Frölunda, það er hverfi sem er um 9 km í burtu frá mér. Það var mjög gaman, ég nennti samt ekkert að drekka, var dealer í póker framan af, síðan þegar ég nennti því ekki lengur fórum við bara í Wii tölvuleik. Ég ætla að hafa það rólegt um næstu helgi fyrst þessi síðasta fór í svona mikið rugl.

Það sem ég á eftir að sakna mest héðan úr Svíþjóð er internetið. Svíar með einu bestu nettenginar í heiminum og sést það bara á þessu grafi sem ég fékk út úr hraðatesti í boði símans

sprengdi alveg skalann, alveg langt langt yfir hröðustu internet-tengingunni á Íslandi

heyri í ykkur

Ný önn

2008-01-28T12:36:00.000-08:00

nú er önnin byrjuð á fullu og hún leggst bara vel í mig. Á þessum fjórðungi er ég er í tveimur kúrsum , "Finite element method - applications" og "compressible flow". Þeir eru frekar krefjandi báðir en ég held samt að þeir séu léttari heldur en kúrsarnir sem ég er búinn að taka hingað til hérna. Þetta leggst bara vel í mig.

bækurnar mínar

Concorde þota í Compressible flow

Annars er ég að hugsa um að koma heim um páskana. Er í mjög löngu páskafríi, alveg frá 12. til 31. mars. Er að skoða möguleikana en ég held að það endi með því að ég komi heim.

ætla að fara leggja mig, mæting klukkan 8 í fyrramálið í skólann.

Hejdå

Dramatisk tisdag

2008-01-22T13:43:00.001-08:00

Þó ég hafi ekki tekið eftir neinu undarlegu í dag er mikið búið að ganga á hérna í Gautaborg. eins og er hægt að lesa hér. Þetta rán var greinilega búið að vera lengi í undirbúningi og allt gert til að gera lögreglunni erfiðara fyrir til að sinna þessu útkalli, t.d. með því að dreifa bakpokum um allan bæ sem voru merktir sem sprengjur ,kveikt í bílum og síðast en ekki síst nöglum dreift á ránsstaðnum til að tefja fyrir löggunni. Gautaborg er reyndar fræg fyrir háa glæpatíðni, vopnuð rán er algeng og mikið af svokölluðum"street gangs" sem eru að berjast um yfirráðasvæði og enda þau átök oft með drápum.

hérna er mynd fengin af www.gp.se af vettvangi.

maður verður greinilega að fara varlega hérna

Nú er okkur nóg boðið

2008-01-22T05:39:00.000-08:00

Nú er okkur nóg boðið! Petition

þó ég hafi ekki verið mikið fyrir pólitík er ég mjög ósáttur við nýju borgarstjórnina. Ég hvet sem flesta að skrifa undir þennan undirskriftalista.

Anime

2008-01-20T11:24:00.000-08:00

Orðið Anime er aðalega notað hér í Vesturlöndum um teiknimyndir frá Japan. Það kannast flestir við þennan teiknistíl þegar þeir sjá hann, þ.e. stór augu, "fancy" hárgreiðslur og fleira (pokémon)

Ég hef alltaf haft mikla fordóma gagnvart anime og þá ekki síður fólki sem horfir á Anime. Fyrir um það bil ári síðan gaf ég þessu samt séns og er síðan þá búinn að horfa á 4 þáttaraðir. Sú besta er tvímælalaust Death Note.

Death note fannst mér mjög spennandi og áhugavert og ég mæli með að fólk gefi þessu séns. Það er mjög flókið að reyna að lýsa þessu en þetta er í fáum orðum sakamálasaga sem snýst aðalega um Light sem fær bók sem er gædd þeim eiginleikum að ef maður skrifar nafn einhvers í hana og hugsar um viðkomandi á með þá deyr hann. Söguþráðurinn er rosalega ferskur og ég hef aldrei séð neitt í líkingu við þetta.

Helsti gallinn að mínu mati við að horfa á japanskar teiknimyndir er augljóslega sá að maður skilur ekki japönsku og þarf þess vegna að horfa stíft á textann allan tímann. Einnig er erfitt að túlka tilfinningar úr samtölunum þegar maður kann ekkert í tungumálinu. Ég held líka að japanir séu miklu gáfaðri heldur en vesturlandabúar og allaveganna af þessu sem ég hef horft á er söguþráðurinn mjög flókinn og stundum jafnvel erfitt að fylgja honum alveg eftir.

Ég ætla samt ekkert að fara hella mér í þetta eins og margir gera, maður vill ekki enda með félagsskap eins og hangir í Nexus ;).

2008-01-18T01:55:00.000-08:00

Ég var að fara í gegnum myndirnar sem ég tók í jólafríinu og held að þetta sé uppáhaldsmyndin mín

rok og rigning

2008-01-16T16:20:00.000-08:00

ég rétti missti af öllum snjónum í Reykjavík. Hér er bara rok og rigning. Það er reyndar oftast rigning hérna finnst mér, enda ekki að ástæðulausu að Gautaborg er kölluð London Skandinavíu, alltaf rigning og pöbbar á hverju horni. En annars er gott að vera kominn aftur. Þarf að gera helling á morgun, þrífa íbúðina, koma hjólinu mínu í stand, fara í ræktina og helst líka að fara í Ikea ef ég nenni.

Bið að heilsa öllum heima á Íslandi. heyrumst.

Jói

vinna næsta sumar

2008-01-12T13:58:00.000-08:00

ég er kominn með vinnu næsta sumar. Ég verð að vinna hjá Línuhönnun. Þetta bar mjög hratt að, fór í starfsviðtal og eftir að hafa svarað nokkrum spurningum um mig og minn námsferil vildu þeir endilega að ég skrifaði undir samning. Ég verð á svokölluðu nýbyggingasviði. Ég hlakka mjög til að byrja þó svo að það sé ennþá langt í þetta.

Annars er ég að fljúga á mánudaginn út, og alvaran tekur við aftur. Er mjög spenntur fyrir kúrsunum á næstu önn, spurning hvort þeir standi undir væntingum.

Blogga meira þegar ég kem til Gautaborgar

sjáumst

gleðilegt nýtt ár

2008-01-01T05:59:00.001-08:00

búinn að hafa það rosalega fínt um jólin

ég kom til Rvk. þann 30. síðastliðinn og hélt áramótin með Gunnu frænku og Co.

smelli hérna inn einni mynd af Gunnu litlu. Er að borða jólaköku.

vona að þið hafið það gott í dag

ciao

jól

2007-12-22T13:26:00.000-08:00

Þetta var frekar erfiður dagur í gær.

Þrjú flug er eiginlega of mikið á einum degi, en þetta gekk alltsaman mjög vel.

Búinn að pakka öllum gjöfunum (takk Anna) og svo er það skötuveisla á morgun hjá þeim Erlu og Óla Skúla.

Set hérna nokkrar myndir.

Flugvélin sem ég flaug með til Danmerkur

Fékk besta útsýnið, hreyfillinn beint fyrir utan gluggann.

Anna að máta nýju lögguhúfuna hans pabba

Hafrún í tölvunni

kominn heim

2007-12-22T05:06:00.000-08:00

kominn heim

erfiður dagur í gær, fór í þrjú flug.

ætla að nota daginn í dag til að slaka á.

hej då

.

Black light

2007-12-18T14:45:00.000-08:00

Ég hef alltaf verið rosalega heillaður af black light. Fyrir þá sem ekki vita er black light útfjólublátt ljós alveg á mörkum sýnilegs ljóss. Það er hægt að lesa meira um það hér. Ég er svo mikill nörd að ég keypti mér svona peru fyrir nokkrum dögum. Ég hef verið að prófa hana og það er hægt að sjá ýmislegt sem maður sér ekki í venjulegu ljósi. T.d. sé ég ýmsa bletti á veggjunum hérna í íbúðinni minni sem sjást ekki annars (vil ekki vita hvað það er).

Ég prófaði líka ljósið á 100 kr seðli og fann að það er prentað á hann með ósýnilegu bleki.
Þetta er á flestum seðlum til að sé auðveldara að sjá hvort seðill sé falsaður eða ekki.

kem heim á föstudaginn, hlakka mikið til.

ciao

næsta kynslóð af flugi

2007-12-15T12:25:00.000-08:00

það verður trúlega hægt í nálægri framtíð að komast frá New York til Tokyo á aðeins tveimur klukkutímum. Þetta er hægt með að nota "nýja" tegund af hreyflum sem nefnast "scramjet" hreyflar.

Með þessum hreyflum er hægt að komast upp í mach 6 eða um 7000 km/klst.

Hreyflarnir eru ekki með neinum hreyfanlegum pörtum eins og nútíma-þotuhreyflar sem gerir viðhald auðveldara.
Þessir hreyflar eru nú ekki alveg nýjir á nálinni en þar til nú virkuðu þeir ekki fyrr en þeir voru komnir yfir hljóðhraða. Nú er verið að smíða fyrstu scramjet þotuna sem getur tekið á loft og lent á eigin spýtur. sjá hér. Yfirborð vélarinnar hitnar svo mikið að það verður að láta eldsneytið kæla ytra byrðið , þetta er gert með því að láta það streyma um kælirör í yfirborðinu áður en það fer í hreyflana. Eldsneytið nýtist líka betur ef það er heitt áður en það er kveikt í því.

Það verður gama að sjá hvernig þessi mál þróast og hver veit nema á næstu 10-20 árum geti maður pantað flug með svona farþegafotu.

Ef ykkur langar til að fræðast meira um þessa þotu mæli ég með að þið spyrjir Hauk Elvar eða Eystein frekar um þetta því þeir eru að læra Fluid mechanics.

verkefnin búin

2007-12-13T04:36:00.000-08:00

jæja þá er þetta búið loksins, var að skila síðasta verkefninu núna í hádeginu. það var mikill léttir.

nú þarf ég bara að læra fyrir próf , nenni því samt eiginlega ekki (búinn að ná áföngunum).

Ég var að hugsa um að skoða möguleikann á því að vera hérna í sumar til að skrifa M.Sc. ritgerðina mína. Það væri frábært þá að útskrifast um næstu jól. Ætla að tala við kennarana í jólafríinu og skoða möguleikann hvort þetta sé hægt.

En "Material Mechanics " býður, þarf að læra 25 sannanir fyrir prófið á laugardaginn.

ciao

Down is the new up

2007-12-11T12:27:00.000-08:00

þetta er allt að smella saman

leiðinlegt hvað ég hef engan tíma til að læra fyrir prófin

gott að ég þarf ekki að ná þeim, þarf ekki einu sinni að mæta í þau til að ná áföngunum.ætla samt að reyna hækka mig í einkunn, hæpið samt að það gangi eitthvað fyrst það er svona lítill tími.

ætla að reyna lesa einhverjar sannanir fyrir svefninn

ciao

lokaspretturinn

2007-12-09T12:51:00.000-08:00

nú er þetta farið að taka í. munnlegt próf á morgun, tvö skilaverkefni í þessari viku og síðan próf á laugardaginn.

vona bara að ég meiki þetta þangað til, er orðinn mjög þreyttur strax.

Blogga meira á morgun

Surstromming

2007-12-05T13:56:00.000-08:00

við strákarnir fórum í keilu við bekkjarfélaga okkar. Það var íslendingar vs. svíar. Svíarnir voru búnir að lofa að borða íslenskan hákarl og ef við töpuðum lofuðum við að borða surstromming. Veit ekki hvað það er en það er víst ógeðslegt, einhverskonar fiskur, mjög vont skilst mér.

en allaveganna til að gera langa sögu stutta þá töpuðum við frekar illilega. Ég gleymdi keilugrifflunum heima og þess vegna gekk mér alveg ömurlega ;).

vona samt að þetta sé ekki svona vont, annars æli ég

Jólin nálgast

2007-12-02T13:43:00.000-08:00

Það er komið jólaskraut út um alla borg. Gautaborgarar eru samt mun hógværari í jólaskrautinu heldur en Íslendingar, þeir gera meira út á stílinn heldur en magnið greinilega.

Ég er búinn að komast af því að Svíar eru mun hógværari og nægjusamari heldur en Íslendingar. Ég gerði mér það ljóst mjög fljótlega eftir að ég kom hingað. Það sést bara á jólagjafa-auglýsingunum hérna samanborið við Ísland, held að Svíar eyði miklu minna í jólagjafir heldur en við. Ég er ekki að segja að þetta sé einhver ósiður hjá okkur að eyða svona miklum peningum ,þetta er bara mismunandi viðmið sem við höfum. Ég held líka að Svíar hafi ekki jafn mikinn pening á milli handanna og við Íslendingar. Atvinnuleysi hérna er um 6% samanborið en á Íslandi er það minna en 1% minnir mig. Það er líka miklu meira vinstrisinnað land heldur en Ísland, skattarnir hérna eru miklir, sérstaklega á hátekjufólk þannig að bilið millri fátækra og ríkra er miklu minna heldur en heima.

Það er kona sem býr hérna nálægt og hún hefur á einhverjum tímapunkti í lífi sínu ákveðið að eignast svín. Ég er ekki að grínast, hún fer út að labba með svínið sitt í bandi annaðslagið, ég hef einu sinni séð það og líka Haukur og Eysteinn. Þetta er líka fáranlega stórt og feitt svín. Ég er núna alltaf með myndavélina á mér í von að ég sjái þau skötuhjú aftur. Ég lofa að setja myndina strax hérna á bloggið ef ég sé þau aftur.

kveð í bili , þarf að gera skýrslu.

ciao

jólagjafirnar í ár

2007-11-25T13:12:00.000-08:00

Þó ég sé ekki mikið jólabarn þá hef ég engu að síður alla tíð verið mikið "gjafabarn", þ.e. ég hef mjög gaman af því að fá gjafir.

Hérna eru nokkar hugmyndir handa ykkur ef þið eruð að leita að gjöf handa mér

Ipod classic

Þó ég eigi tvo ipoda fyrir þá eru þeir báðir orðnir frekar slappir. Þetta væri kærkomin gjöf fyrir fátækan námsmann sem hefur ómælda ánægju af því að hlusta á tónlist.

Bolir

maður á aldrei nóg af bolum. Mig vantar helst langerma boli núna.

Sokkar

Mig vantar svo fleiri hjólasokka, þ.e. lágir sokkar sem anda vel og eru (oftast) með þykkum hæl. Fást trúlega í Markinu eða Erninum

Hjólapumpa

Ég er alltaf að sprengja dekkin hjá mér og á bara mjög litla handpumpu. Þetta kæmi sér mjög vel fyrir mig.

Nærföt

ekki mikið um þetta að segja, það er alltaf hægt að finna einhver not fyrir nærföt.

Þetta á að duga handa ykkur í bili

bæbæ

aqua teen hunger force

2007-11-24T11:38:00.001-08:00

Ég er búinn að vera að horfa á Aqua teen hunger force . Ég horfði á þetta allt síðasta vor og hef verið aðeins að horfa á þátt og þátt núna milli stríða. Mér finnst þetta alveg frábærir þættir, rosalega öðruvísi, maður veit aldrei við hverju maður á að búast. Ég mæli að þið gefið þessu séns.

Annars er það bara forritun og meiri forritun. Það mætti halda að ég væri að læra forritun en það er ekki tilfellið. Þetta er samt gríðarlega gagnlegt, með því að láta tölvuna reikna fyrir mig þá getur hún reiknað eitthvað á nokkrum sek.- nokkrum mín. dæmi sem ég gæti ekki reiknað þó ég hefði alla ævina til þess. Þetta er bara oft mjög erfitt oft, lykkjur eftir lykkjur og það má ekki vera nein villa því þá fer allt í klessu.

Annars er ekkert að frétta, ætla að reyna að kaupa jólagjafir á morgun ef ég nenni.

bið að heilsa ykkur

ekkert að gerast

2007-11-20T10:34:00.000-08:00

líf mitt er einstaklega óáhugavert núna, bara skóli og ræktin.

hérna er graf sem ég var að gera

frekar ómerkilegt graf virðist vera en það tók rosalega langan tíma að gera það get ég sagt ykkur.

annars er ég bara farinn að hlakka til jólanna og hlakka til að komast til Íslands

kveð í bili

matlab

2007-11-15T13:09:00.000-08:00

líf mitt snýst þessa dagana aðalega um að forrita. Er að forrita hvernig efni hagar sér undir mismunandi tímaháðu álagi og til gamans má geta að efnið hefur ýmsa eiginleika sem ég hef ekki fengið að vinna með áður t.d. ef það er sett of mikið álag þá skemmist efnið og verður fyrir varanlegri formbreytingu og ýmsa fleiri eignleika sem ég nenni ekki að telja upp hérna. Þetta er tímafrekt en samt bara gaman. Ég er mjög þakklátur foreldrum mínum að hafa lofað mér að vera svona mikið í tölvu þegar ég var yngri og hvað þau voru örlát að uppfæra tölvurnar þegar þess þurfti. Ég held að öll þessi tölvunotkun hafi gert mér mjög gott því ég á hvort sem er eftir að vinna við tölvur það sem eftir er þannig að það er bara eins gott að byrja snemma. Ég er líka þeim mjög þakklátur fyrir að gefa mér allt tæknilegóið sem ég átti, ég held að það hafi kveikt áhuga minn á verkfræði. Tæknilegó var það skemmtilegasta sem ég gerði. Ég átti rafmótur, tjakka, fullt af tannhjólum, hjöruliði, snigla og fullt af íhlutum. Það sem ég gerði aðalega voru bílar, gíraði þá upp og niður og var að keppast við að láta þá fara sem hraðast og líka að reyna að fá þá upp upp sem mestan halla. Brautirnar bjó ég til úr bókum og Andrésar andar möppunum hennar Hilmu.

Ég held að það viti fáir aðmennilega hvað ég er eiginlega að læra en í stuttu máli þá er ég í M.Sc. námi í "applied mechanics" í verkfræðiskóla sem heitir Chalmers. Þetta flokkast sem vélaverkfræði og ég er að sérhæfa mig í burðarþolsfræði og efnisfræði. Ég er með háskólagráðu í vélaverkfræði (B.Sc.) frá Háskóla Íslands en til að ég geti fengið starfstitilinn "Verkfræðingur" þá þarf ég að vera með M.Sc. gráðu. Starfsheitið "verkfræðingur" er lögbundið starfsheiti og þarf að sækja um titilinn hjá Verkfræðingafélagi Íslands. Ég mun að öllum líkindum útskrifast vorið 2009 og ef allt gengur af óskum mun ég fara beint inn á vinnumarkaðinn. Það er mjög auðvelt að fá vinnu á Íslandi sem verkfræðingur og sérstaklega mikil eftirspurn eftir vélaverkfræðingum sem hentar mér mjög vel.

þetta er nóg í bili um verkfræðinga í bili.
Ég skil samt að það viti enginn hvað ég er að læra, stundum skil ég ekki efnið sjálfur ;).

Ég er búinn að vera rosalega mikið í spinning þessa dagana og í tilefni þess keypti ég mér nýja skó.

Þetta eru hjólaskór og eru þeir með alveg stífum botni. Járnstykkið þarna framarlega á skónum festist í pedalann og get ég með því skilað miklu meira afli því í staðinn fyrir að ýta bara pedulunum niður þá get ég líka togað þá upp. Það er reyndar ekki hægt að gera neitt annað en í þeim heldur en að hjóla því botninn í þeim gefur ekkert eftir og þeir eru mjög sleipir vegna þess að botninn er bara úr hörðu plasti, ekkert gúmmí. Ég er búinn að fara í einn spinning tíma með þeim og þeir reyndust mjög vel, er einstaklega ánægður með þessi kaup.

föstudagur á morgun,

vona að þið eigið góða helgi
ciao

áhugaverð frétt

2007-11-13T02:53:00.000-08:00

visir.is frétt

held að þetta verði til að fleiri velji að fara til Svíþjóðar til náms

ætla að halda áfram að læra.

ciao

þunnur......

2007-11-10T07:02:00.000-08:00

Það var oktoberfest hérna í skólanum í gærkvöldi. Það var mjög gaman og fín stemming og fullt af skemmtilegu fólki. 1 L af bjór kostaði 70 sænskar krónur sem er ca. 600 kr. Ég fann það í morgun þegar ég vaknaði að ég hefði drukkið of mikið, var alveg rosalega þunnur. Mér líður betur núna samt, nenni samt ekki í ræktina.

Ég ætlaði að fara í dag að fá mér hjólaskó, Svíar virðast virða það mikið að fólk eigi að fá frí um helgar. Það eru eiginlega allar hjólabúðir lokaðar í dag þannig að ég verð að bíða þangað til eftir helgina.

þreyttur en ánægður

2007-11-06T13:42:00.000-08:00

þetta var frekar langt ferðalagt, um 500 km hvor leið.

Við fórum klukkan 10 í gærmorgun og ég var bara að koma heim núna. Við tókum bara ódýrustu og hægustu lestirnar og tók ferðalagið 5 klukkustundir hvora leið.

María Marteins kom á móti okkur alveg niður á lestarstöðina og sá um okkur mest allan tímann og lofaði okkur að gista hjá sér um nóttina.

Tónleikarnir voru alveg frábærir, það er eiginlega eina sem ég get sagt. Ég hef reyndar aldrei verið á tónleikum sem hljóðstyrkurinn hefur verið svona mikill, ég er ennþá með suð í eyrunum. Myndavélin mín var ekkert að gera góða hluti þarna, það var of dimmt og ég var og langt í burtu frá sviðinu.

Þær eru allar meira og minna hreyfðar eins og sést á þessari mynd.

Daginn eftir fórum við að skoða okkur aðeins um borgina, það var frekar kalt og þungskýjað. Það var eiginlega of dimmt til að taka einhverjar myndir af viti en ég tók nokkrar.

Haukur hress

þrengsta gata sem ég hef séð.

Haukur hitti einhverja stelpu, það varð samt ekkert meira úr þessu heldur en þessi eini koss, alltaf erfið svona sambönd þar sem annar aðilinn er úr plasti, sjáið bara t.d. Michael Jacksson.

Páll og Haukur hressir á heimleið.

ég ætla að fara að leggja mig

vona að þið hafið gaman af myndunum

kveð að sinni

Bæbæ

alveg að koma helgi

2007-11-01T12:03:00.000-07:00

er bara í einum tíma á morgun klukkan 13:15-15 þannig að það er eiginlega komin helgi hjá mér.

Stokkhólmur á mánudaginn til að fara á tónleikana með Arcade fire. Þetta verður bara smá að skreppa, komum aftur á mánudaginn. Ég er mjög spenntur því ég hef fylgst mjög mikið með þessari hljómsveit alveg frá því að hún gaf út fyrsta diskinn sinn.

Ég ætla að reyna að vera mættur klukkan 7 í ræktina í fyrramálið þannig að ég ætla að fara að leggja mig

bið að heilsa ykkur öllum

Kveðja Jói Gunnars.